ՀՀ ԱՆ. Հանդիպումներ Տավուշի մարզի բժիշկների հետ

 Երեկ Տավուշի մարզի Իջևանի առողջության առաջնային պահպանման կենտրոնի  և Աչաջրի առողջության կենտրոնի բժիշկների հյուրն էր ՀՀ առողջապահության նախարար Լևոն Ալթունյանն էր։ Ինչպես և մյուս հանդիպումների ժամանակ նախարարն առողջության առաջնային պահպանման (ԱԱՊ) օղակի բժիշկներին ներկայացրել է առողջապահության ոլորտում իրականացվող բարեփոխումները։ 

Հատուկ անդրադարձ է կատարվել էլեկտրոնային առողջապահության համակարգի, կլինիկական ուղեցույցների և գործելակարգերի մշակման և  ներդրման աշխատանքներին, ԱԱՊ օղակում կանխարգելիչ ուղղվածության աշխատանքների շեշտադրմանը, թերապևտիկ ուղղվածության հիվանդությունների բուժումն ամբուլատոր պայմաններում կազմակերպմանը։ Բժիշկներին առանձնակի հետաքրքրել է ԱԱՊ օղակի մասնագետների վարձատրության մեխանիզմն ըստ բոնուսների։ 

Քննարկման ընթացքում նախարարը նշել է, որ էլեկտրոնային առողջապահության համակարգի կիրարկման ընթացքում ի հայտ եկած և հայտնաբերված անճշտությունները հնարավորինս արագ կշտկվեն, իսկ համակարգի ողջ ծավալով գործարկման դեպքում զգալիորեն կդյուրացվի բժիշկների աշխատանքը:  Լևոն Ալթունյանը նաև տեղեկացրել է, որ առաջիկա ամիսներին ԱԱՊ օղակը կապահովվի համակարգիչներով, որին կհաջորդի բուժաշխատողների ուսուցումը։ Բժիշկները հայտնել են, որ իրենք պատրաստ են ոլորտում իրականացվող բարեփոխումներին։

Քննարկվել են նաև պատվաստումներին, դեղատոմսերի լրացմանը  վերաբերող և այլ հարցեր:

ԱԱՊ բժիշկների կողմից առաջարկվել է մարզերում հնարավորինս հաճախ կազմակերպել սեմինարներ, կլոր սեղաններ, հանդիպումներ, ինչպես նաև  արտագնա վերապատրաստումներ։ 

Հարցեր, պատասխաններ, մեկնաբանություններ